راشد الغنوشي، الدستور، التطبيع مع إسرائيل، و الحقـــــــــــــــائق الخفيَــــــــــــــــــــة

راشد الغنوشي، الدستور، التطبيع مع إسرائيل، و الحقـــــــــــــــائق الخفيَــــــــــــــــــــة

البارح كي حكيت على الصحافة الصفراء الجديدة التابعة للحزب الحاكم الجديد، اللي مهمتها تزوير الحقائق و تشويه المعارضين و هتك أعراضهم، فمة جماعة خاضوا و دخلوا على الباج بردلوها، و بداو يخدموا في خدمتهم في الترهيب و التشويه كي العادة.. الليلة، سرباولنا مثال هايل في تزييف الحقائق و الكذب و التبلعيط، حقيقة نموذج حقو يتقرى في الجامعات !


موضوعنا اليوم هو راشد الغنوشي، اللي قال انو الدستور التونسي موش باش ينصص على تجريم التطبيع مع إسرائيل.

أية سيدي، حسب صفحة "الحقـــــــــــــــائق الخفيَــــــــــــــــــــة" قالك "هذا الخبر عاري عن الصحة بتاتا وان الخبر الاصلي موجود في مجلة لمجلة "ويكلي ستاندار" الأمريكية الذي تم تحريفه من قبل الجريدة". هاو آش مكتوب في مقال "ويكلي ستاندار" اللي حطوا الرابط متاعو :

Earlier in the week Israel Hayom reported that the new Tunisian constitution may include “a section condemning Zionism and ruling out any friendly ties with Israel.” Yesterday Rached Ghannouchi, ... disputed the report. “I don’t think this clause will be included in the constitution,” said Ghannouchi.

الترجمة : سابقا هذا الأسبوع نقلت إسرائيل هايوم أن الدستور التونسي الجديد يمكن أن يحتوي على فصل يدين الصهيونية و إقامة أي علاقات صداقة مع إسرائيل. راشد الغنوشي شكك في هذا التقرير. "لا أظن أنه سيقع تضمين هذا الفصل في الدستور"، قال الغنوشي.

His aides clarified that the condemnation of Zionism was in a document between the leading parties. As for the constitution itself, Ghannouchi continued, “I don’t think it should be included.” There’s no reason, he explained, to outline policies about a situation in flux like the Arab-Israeli crisis. “The only country that should be named in the constitution,” said Ghannouchi, “is Tunisia.

الترجمة : و وضح أيضا أن إدانة الصهيونية كانت في وثيقة بين الأحزاب الحاكمة. لكن بالنسبة للدستور، يواصل الغنوشي : "لا أظن أنه سيقع إدخال هذا، ليس هناك سبب لتحديد قوانين حول وضعية متذبذبة مثل الأزمة العربية-الإسرائيلية. البلد الوحيد الذي يجب ذكر إسمه في الدستور، هو تونس."

هذا الموجود في الصفحة الأولى من المقال، ترجمتو ترجمة حرفية، و هاو الرابط

أما الفقرة التي تم نقلها في الصفحة، فهي موجودة في الصفحة الثانية، و ما قالهاش الغنوشي في زيارتو هاذي لأمريكا بل قالها في حوار مع موقع "العرب" بتاريخ 02/05/2011،  فمة رابط في الصفحة الثانية من المقال يوجهلو (الفقرة قبل الأخيرة) عن طريق كونت مارتن كرامر على الفايسبوك اللي ترجم المقال من العربية إلى الانجليزية.


هذا الرابط نحو كونت مارتن كرامر الموجود في المقال، و هذا الرابط نحو المقال الأصلي اللي تقال فيه الكلام هذا. 

يعني بإختصار، الكلام اللي قالو ردوه ما قالوش، و الكلام اللي ردوه قالو توة، قالو بالحق أما في ماي اللي فات، لوسيلة إعلام أخرى في بلاد أخرى.. بالعكس، المقال يعلمنا انو "الغنوشي كان متردد في الحديث حول إسرائيل و الفلسطينيين، و قال انو إهتمامو بتونس" (صفحة 2)، و الجماعة ردوه يحب يفني الكيان الصهيوني جملة..


أما مسكين المواطن التونسي البسيط اللي ما يعرفش يقرا بالإنجليزية.. خاصة وقتلي نعرفو اللي برشة توانسة ما عندهمش وسع بال، و حتى بالعربي ما يقراوش !


أية سيدي، هاي ممارسات "الصفحات الثورية الشريفة" اللي هي مسمية روحها هكة، و نهار كامل تنقد و تثلب و تشوه في كل من ينقد ولا يعارض الحزب الحاكم الجديد و تنظم ضدو حملات التشويه.. كذب، تزييف للحقائق، توظيف للقضية الفلسطينية، تستر على اللي أقام الدنيا و لم يقعدها على "دعاة التطبيع" و "الصهاينة" و بعث العباد تاكل في المتراك و اللاكريموجان في إعتصام القصبة 3 على حكاية فشوالة، و هو الهدف متاعو حل الهيئة العليا متاع عياض بن عاشور (أول مطلب تحط في الإعتصام) باش ما تعملش قانون ينظم تمويل الأحزاب..

المصيبة اللي مشرف الصفحة و اللي مهبط الخرافة هاذي (اللي نسخايلو "صاحبي"، و كنت الوحيد اللي تكلم عليه في وسائل الإعلام كي توقف و إستدعيتو بعدها لبرنامجي، و اسألوه هو و حمدي بن صالح "سكندالي") شبع خبط و توقف و تمرمد في جرة هالحكاية.. و شي ما شعفش !


مرة أخرى : اعرفوا شكون اللي يعطي فيكم في الحقيقة مجردة، و شكون اللي قاعد يستبله فيكم بلوغة الدين و القضية.. و دليلكم ملك